Schdirbd Schwäbisch aus?

Schwäbisch ▼

Hier kann man den Text hören.

I fend, i sodd jetzt au mol ebbes saga zom schwäbischa Dialekt:

Emmer weniger Leit schwätzed a gscheids Schwäbisch, worom eigendlich?

Also, mir älle hend an Menderwerdichkeitskomplex, wenn mir schwäbisch schwätzet. Des hend die Lehrer domols scho en onsere Kepf gsetzt. Hosch ebbes gsaid, no hot's ghoißa „Und wie sagt man es auf Schriftdeutsch?“ Isch klar, Schriftdeutsch isch, wie der Noma sagt, für 's Schreiba. Aber schwätza sott mr saen Dialekt! Früher hot mr scheinbar gmoint, de Kender wärat z'bleed zom Schriftdeutsch schreibe, wenn se Dialekt schwätzed. Also, bloß de ganz Domme, die sowieso emmer em Digdad versagt hend, hends et glernt. Aber älle andre scho.

Des mit dem Menderwerdichkeitskomplex war et scho emmer, denkat an da Theodor Heuß, da erschda Bundespräsidenda. Der hot ganz schee gschwäbelt, ond er isch trotzdem von älle verehrt worda. Heit isch eher peinlich, wenn mr ama Redner wia dem Öttinger rausheert, daß der koi gscheids Hochdeutsch ko.

Der Menderwerdichkeitskomplex wird von außa no verschdärgd, des mergat die Schwoba, die moinet, se müssat zom Beischbiel en Berlin wohna. Wenn an Berliner ond an
Schwob mitnander schwätzed, no send dia Berliner natierlich schneller mit ihrer Gosch als de langsame Schwoba. Ond scho hot dor Schwob glei a Schdickle mee von saem Menderwerdichkeitskomplex dahzukriagd. Drfir send de Schwoba eher Dickbrettbohrer ond Difdala. Ond dees brauchd halt sei Zeit. Schnellschwätzerei isch do et gfrogt. Große Dichter, Dengger ond Erfender (a baar: Schiller, Hölderlin, Hegel, Schelling, Hauff, Kepler, Mörike, Hesse, Bosch, Daimler, Schrauba-Würth ond gwieß no a baar meh) kommad älle aus m Schwobaland.- Des sodd mr et vergässa.

Jo, ond no isch au s Fernsäh. Seit dor Willy Reichert nemme läbt gibt’s fascht nie ebbes Schwäbisches (obwohl 's ziemlich guade schwäbische Schausbieler hot! ). Wenn mr "Soko Stuttgart" aguckd, no gibt’s bloß zwoi Schauschbieler mit kleine ond bißle bleede Näbarolla, die wo schwäbisch schwätzed, dr Schrotti und der mit dr Asservatenkammer. Ond seit dr Bienzle weg isch, isch au dor Tatort aus Schduagard frei von Schwäbisch. Heidanei, des deff doch et wohr sai! Guggd mr an eeschdreichischa Krimi, die schwätzat manchmol so an Dialekt, daß mr se kaum vrschohd! Des gleiche isch bei bayrische ond schweizerische Krimis. Neilich war i bei ra Beerdigung en dr Schweiz, gar et weit weg von dor deutscha Grenze. Die "frei schaffende Theologin", so hot se sich vorgschdelld, hot ihr Ooschbrach dermaßa uff schwizderdütsch ghalta, do isch mr bloß mit Mih ond Not grad no so halt mitlkomma! Also, die hend älle koine Menderwerdichkeitskomplex!

Ond no send do no die haufaweis Reigschmeckte. Weil die nie koi schwäbisch lernat, moinet mir älle mit onserem Menderwerdichkeitskomplex, mir müßdad bloß no hochdeutsch mit dene schwätza.

Des goht so weit, daß mir so langsam da oigana Dialekt verlernat. Neilich hemmr ons onderhalda, was a „Ragall“ isch. Do send mir, boide Schwoba, nemme einig gworda, was dees GENAU isch. Irgend a liederlichs, beeses Weib halt, aber genauer war's ons et klar. Mir schwätzad onseren oigana Dialakt so wenig, daß mir en langsam verlernat!

Ond no welled se a neis Onderrischtsfach ofanga, wo mr dene Jonge schwäbisch beibrenga mechd.

Also, ehrlich: do kommd des gleiche raus wie noch em Fremdschbrocha-Onderrichd: wer von Uich ko Franzesisch fließend schwätza noch a baar Johr Schulfranzösich? Ha?

Zom Dialektschwätzakenna gheert nemlich, daß mr 's scho als Kendle lernt ond no ällaweil weiter schwäbisch heert ond au schwätzt, sonsch wird nix draus..

Gscheider wär, mr däd amol über a Rechdschreibong fir da schwäbischa Dialekt nochdengga!

Also, i fend, mir älle send schuld, daß dr schwäbische Dialekt schdirbd. Wäga onsrem Menderwerdichkeitskomplex, wäga dem Ibermaß an Hochdeutsch, des ällaweil auf oin neihagld, weil 's zur Zeit koine schwäbische Vorbilder meh gibt. (Dr Winfrided Kretschmann isch a Ausnohm, so sodd's eifach viel meh gäbba!). Ond so lernat dia Kender (meine au!) et ihr Mutterschbroch me, sondern dees, was uff dr Gaß on em Fernsäh gschwätzt wird.

Mir brauchad koine Schulschdond fir schwäbisch, mit brauchad wieder onser altes Selbschdverdraua ond sodded onsren Dialekt au emmer schwätza, wenn mir 's Maul aufmachat. Ond wenn dia Reigschmeckte oos et verschdandat, no sollet se den Dialekt halt lerna, wenn se bei ons em Ländle wohnat. Send doch koine Turischda, dia bloß a Weile uff Bsuch send ond no wieder gangat, heidanai nomool aberau!

Sonsch send mir selber schuld am Ondergang vomma ganz bsondra Kulturgut, onserm scheena Schwäbisch!