Schdirbd Schwäbisch aus? - Dr. Albrecht Kadauke - private Webseite

Dr. Albrecht und Dr. Dorothee Kadauke - private Website
Direkt zum Seiteninhalt

Schdirbd Schwäbisch aus?

Schwäbisch ▼

Hier kann man den Text hören.

  
I fend, i sodd jetzt au mol ebbes saga zom schwäbischa Dialekt:

Emmer weniger Leit schwätzed a gscheids Schwäbisch, worom eigendlich?

Also, oi Problem isch: mir älle hend an Menderwerdichkeitskomplex, wenn mir schwäbisch schwätzet. Des hend die Lehrer domols scho en onsere Kepf gsetzt. Hosch ebbes gsaid, no hot's ghoißa „Und wie sagt man es auf Schriftdeutsch?“ Isch klar, Schriftdeutsch isch, wie der Noma sagt, für 's Schreiba. Aber schwätza sott mr saen Dialekt! Früher hot mr scheinbar gmoint, de Kender wärat z'bleed zom Schriftdeutsch schreibe, wenn se Dialekt schwätzed. Also, bloß de ganz Domme, die sowieso emmer em Digdad versagt hend, hends et glernt. Aber älle andre scho.

Des mit dem Menderwerdichkeitskomplex war et scho emmer, denkat an da Theodor Heuß, da erschda Bundespräsidenda. Der hot ganz schee gschwäbelt, ond er isch trotzdem von älle verährt worda. Heit isch eher painlich, wenn mr ama Redner wia dem Öttinger rausheert, daß der koi gscheids Hochdeutsch ko, aber moint, er däd koi Schwäbisch schwätza deffa!

Der Menderwerdichkeitskomplex wird von außa no verschdärgd, des mergat die Schwoba, die moinet, se müssat zom Beischbiel en Berlin wohna. Wenn an Berliner ond an Schwob mitnander schwätzed, no send dia Berliner natierlich schneller mit ihrer Gosch als de langsame Schwoba. Ond scho hot dor Schwob glei a Schdickle mee von saem Menderwerdichkeitskomplex dahzukriagd. Drfir send de Schwoba eher Dickbrettbohrer ond Difdala. Ond dees brauchd halt sei Zeit. Schnellschwätzerei isch do et gfrogt. Große Dichter, Dengger ond Erfender (a baar: Schiller, Hölderlin, Hegel, Schelling, Hauff, Kepler, Mörike, Hesse, Bosch, Daimler, Schrauba-Würth ond gwieß no a baar meh) kommad älle aus m Schwobaland.- Des sodd mr et vergässa.  

Jo, ond no isch au s Fernsäh oder, wia mr heid sechd, die "Media". Seit dor Willy Reichert nemme läbt, gibt’s fascht nie ebbes Schwäbisches (obwohl 's ziemlich guade schwäbische Schausbieler hot! ). Wenn mr "Soko Stuttgart" aguckd, no gibt’s bloß zwoi Schauschbieler mit kleine ond bißle bleede Näbarolla, die wo schwäbisch schwätzed, wia dr Schrotti und der mit dr Asservadakammer. Ond seit dr Bienzle weg isch, isch au dor Tatort aus Schduagard frei von Schwäbisch. Worom's no "Tatort Stutgtgart" hoißt, bleibd mir a Rädsl! Heidanei, des deff doch et wohr sai! Guggd mr an eeschdreichischa Krimi, die schwätzad manchmol so an Dialekt, daß mr se kaum mee vrschohd! Des gleiche isch bei bayrische ond schweizerische Krimis. Neilich war i bei ra Beerdigung en dr Schweiz, gar et weit weg von dor deutscha Grenze. Die "frei schaffende Theologin", so hot se sich vorgschdelld, hot ihr Ooschbrach dermaßa uff schwizderdütsch ghalta, do isch mr bloß mit Miih ond Nod grad no so hald mitlkomma! Also, die hend älle koine Menderwerdichkeitskomplex!


Ond no send do no dia haufaweis Reigschmeckde. Weil die nie koi schwäbisch lernat, moinet mir älle mit onserem Menderwerdichkeitskomplex, mir dirfdad bloß no hochdeutsch mit dene schwätza.
Des goht so weid, daß mir so langsam da oigana Dialekt verlernat. Neilich hemmr ons onderhalda, was a „Ragall“ isch. Do send mir, boide Schwoba, nemme einig gworda, was dees GENAU isch. Irgend a liederlichs, beeses Weib halt, aber genauer war's ons et klar. Mir schwätzad onseren oigana Dialakt so wenig, daß mir en langsam verlernat! Heimadland!

Ond no welled se a neis Onderrischtsfach ofanga, wo mr dene Jonge schwäbisch beibrenga mechd.
Also, ehrlich: do kommd des gleiche raus wie noch em Fremdschbrocha-Onderrichd: wer von Uich ko Franzeesisch fließend schwätza noch a baar Johr Schulfranzösich? Ha?

Ond 's ällerneischde gibt's do:
Ob dees an bleibenda Wärt hot, dees bezweiflii schdarg.

I denk, dees isch wieder wia bei dene klasse Schauschbieler ond Onderhalder von heit wie "Dodokai", "Dui on de Sell", "Hillus Herzdropfa" - die schbielad faschd bloß vor glernde Schwoba, die sich  manchmol vor Lacha end Hos mached keeded. De andere ..., also jedenfalls koiner lernd drvo Schwäbisch. Nadierlich et.
Zom Dialektschwätzakenna gheert nemlich, daß mr 's scho als Kendle lernd ond no ällaweil weiter schwäbisch heert ond au schwätzt, sonsch wird nix draus..
Gscheider wär, mr däd amol über a Rechdschreibong fir da schwäbischa Dialekt nochdengga!
Ond de viele schwäbische Läsorbrief et bloß drugga, sondern ao als Tondokument schbeichara. no hot mr a bißle a läbendichs Archiv von de viele verschiedene Onderdialegde. A Tondokument kooh mr mit jedm gscheida Handy herschdella.

Gheerd jetzt grad ed ganz drzua, abor  bei "Handy" felld mir a Witzle ai:

Woher kommt dr Noma "Handy" eigentlich? Ha? Aus am Schwäbischa nadiierlilch:
Domols, wo de Handys no ganz äbbes Neies wared, do sen die erschde uff dr Kenigsschdroß en Schduagard em Lada romgschdanda. No isch oinor komma, der hot saumäßig gschdaund on hot gsaid: "Ja, hend die koi Schnur?" - Gell ond seitdem hoißat die "Handy", hald a bißle amerikanisch gschrieba.

Also, i fend, mir älle send schuld, daß dr schwäbische Dialekt schdirbd. Wäga onsrem Menderwerdichkeitskomplex, wäga dem Ibermaß an Hochdeutsch, des ällaweil auf oin neihagld, weil 's zur Zeit koine schwäbische Vorbilder meh gibt. (Dr Winfrided Kretschmann isch a Ausnohm, so sodd's eifach viel meh  gäbba!). Ond so lernat dia Kender (meine au!) et ihr Mudderschbroch  mee, sondern dees, was uff dr Gaß on em Fernsäh gschwätzt wird.

Mir brauchad koine exdra Schulschdonda fir schwäbisch, mit brauchad wieder onser altes Selbschdverdraua ond sodded onsren Dialekt au emmer schwätza, wenn mir 's Maul aufmachad. Ond wenn dia Reigschmeckte oos et verschdandad, no solled se den Dialekt halt lerna, wenn se bei ons em Ländle wohnad. Send doch koine Turischda, dia bloß a Weile uff Bsuch send ond no wieder gangad, heidanai nomool aberau!

Sonsch send mir selber schuld am Ondergang vomma ganz bsondra Kulturgut, onserm scheena Schwäbisch!


letzte Aktualisierung: 23.02.2024
Zurück zum Seiteninhalt